А.Есімов: Астанадағы ЭКСПО құрылыстарын салуға 262 отандық тауар өндіруші тартылды

22 Маусым, 2016 15:53

Көрме нысандарының құрылысына 262 отандық тауар өндіруші тартылып, 36,9 млрд. теңгенің келісімі бекітілді. Көрсетиілген қызметтің, жеткізілген тауар мен материалдардың құны 255,8 млрд. теңгені құрады. Бұл туралы «Астана ЭКСПО-2017» ҰК» АҚ басқарма төрағасы Ахметжан Есімов «ЭКСПО нысанының құрылыстарына қазақстандық қамту» тақырыбында өткен Қоғамдық кеңестің отырысында айтты.

Еске сала кетейік, 2015 жылдың тамыз айына дейін ЭКСПО құрылысында жергілікті қамту үлесі нөлге жақын еді. Қазақстандық компаниялардың бұл нарыққа кірулері бірқатар себептермен мүмкін болмаған.

«2015 жылдың тамызынан бастап біз құрылыс саласына қатысты өнімдерді шығаратын отандық кәсіпорындарды белсенді түрде тарта бастадық. Бүкіл Қазақстанды аралап, үлкен жұмыстар атқардық. Бүгінгі таңда барлық облыс және Астана мен Алматы әкімдіктерімен ынтымақтастық туралы Меморандумдарға қол қойдық. Біз қазақстандық компаниялармен келісім жасаудың артықшылығына бас мердігерлердің көзін жеткіздік»,-деп атап өтті А.Есімов.

ҚР Президенті ЭКСПО нысандарының құрылысын жүргізуде барынша қазақстандық қамту мәселесін міндеттеген болатын. Президент жұмыс барысына жоғары баға берді.

«Көрме нысандарының құрылысына 262 отандық тауар өндіруші тартылып, 36,9 млрд. теңгенің келісімі бекітілді. Көрсетиілген қызметтің, жеткізілген тауар мен материалдардың құны 255,8 млрд. теңгені құрады. Шетелдік мердігерлердің қазақстандық жеткізуші компаниялармен жұмыс істеудің тиімділігін түсіндіріп, көздерін жеткізу қиынға соқты»,-деді А.Есімов.

Оның айтуынша, Қазақстанда шетелдік тауарлармен баламалы түрде бәсекелесе алатын өзіміздің сапалы өнім жеткілікті.