• Басты
  • Ақтөбе облысының әкімі 157 түлекке «Алтын белгі» төсбелгісін табыстады (ФОТО)

Ақтөбе облысының әкімі 157 түлекке «Алтын белгі» төсбелгісін табыстады (ФОТО)

18 Маусым, 2016 15:01
Мектеп бітірушілердің мерекесі Ақтөбедегі Тұңғыш Президент атындағы саябақта болып өтті. Дәстүрлі «Жас түлек - 2016» фестиваліне үш мыңнан астам түлек пен олардың ата-аналары қатысты, деп «Ақтөбе ақпарат» ақпарат орталығы хабарлайды.

Облыс әкімі Бердібек Сапарбаев білім ордаларымен қош айтысып жатқан оқушыларды өмірлеріндегі маңызды оқиғамен құттықтады.

«Мемлекет басшысы қазақстандықтардың бәсекеге қабілетті болуы үшін негізгі фактор болып саналатын білім жүйесінің дамуына айырықша назар аударады. Өскелең ұрпаққа білім беру мақсатында елімізде жыл сайын жаңа білім беру нысандары ашылуда. Соңғы үш жылда өңірде білім саласын дамытуға 164 млрд. теңгеден астам қаражат бөлінді, 30 жаңа мектеп салынды. Құрметті түлектер, сіздерге еліміздің үмітін ақтаңдар дегім келеді, ата-аналарыңның армандарын орындап, жаңа белестерді бағындыра берулеріңе тілектеспін. Естеріңізде болсын, Сіздер біздің мемлекеттің болашағысыздар», - деді Бердібек Сапарбаев.

Өңір басшысы өз еңбегімен, білімімен аймақтың абыройын асқақтатып жүрген жастарға, ҰБТ қорытындысы бойынша үздік көрсеткіштерге қол жеткізген түлектерге ерекше алғысын білдірді.

Облыс әкімі биылғы оқу жылында 48 ақтөбелік мектептің халықаралық білім сайыстарында Ақтөбе облысының беделін жоғарылатқанын тілге тиек етті. 157 оқушы «Алтын белгі» иегері атанды, тағы 244 түлек ерекше үлгідегі аттестат алды. ҰБТ қорытындысы бойынша, ең жоғарғы балды Мұғалжар ауданы А.Жұбанов атындағы мектебінің оқушысы Құлшар Қалыбек жинады.

Сонымен бірге жақсы көсеткіштерге қол жеткізіп жүрген мектептердің қатарында Ақтөбе қаласындағы № 15, 21, 51 мектептері, №3 Алға орта мектебі, Ырғыз ауданындағы Ырғыз гимназиясы, Темір ауданында Шұ барқұдық гимназиясы, Хромтау ауданының №5мектеп-гимназиясы бар.

Құттықтау сөзін аяқтай келе Бердібек Сапарбаев «Алтын белгі» иегерлеріне алғыс хаттар мен еліміздің кез келген оқу орнына түсуге мүмкіндік беретін құжаттарды табыс етті.

 

 

Барлық жаңалықтар