М.Бегентаев: Павлодар облысында 23 жаңа емдеу мекемесі ашылды

Аймақ басшысының орынбасары өз сөзінде облыста денсаулық сақтау нысандарының жыл санап артып бара жатқанын атап өтті. Сонымен қатар, өткен ғасырдың 20-жылдары барлық дәрігерлердің саны 30-ға жуық адам болып, олардың ішінде ауылдық жерде 10-ы ғана болса, бүгінгі таңда облысымызда 423 медициналық мекеме жұмыс істеп тұр. Ал бұл - 2 мыңнан астам дәрігер және 5 мыңнан астам орта медициналық қызметкер.

Жалпы, соңғы жылдары 23 жаңа емдеу мекемесі ашылды, оның ішінде облыстық перинаталдық орталықтың корпусы. 

Бүгінде Павлодар және Екібастұз қалаларында 3 инсульт орталығы, облыстық кардиохирургиялық орталық жұмыс істеп тұр. Еліміз бойынша мұндай орталықтардың саны - 3. 

М.Бегентаев мемлекеттің азаматтардың денсаулығын сақтау бойынша қабылдап жатқан шараларының арқасында жалпы өлім-жітік көрсеткіші 11,4%-ға төмендегенін, соңғы 5 жылда шараналардың шетінеуі екі есе азайғанын, 2010 жылмен салыстырғанда қан айналымы жүйесі ауруынан көз жұму 55,9%-ға азайғанын атап айтты. Оған қоса, инфекциялық аурулардың және  қан айналымы жүйесі ауруларының саны тұрақты түрде азайып отыр.  

Облыс әкімінің орынбасары медицина қызметкерлерін кәсіптік мерекелерімен құттықтап, оларға береке, денсаулық және жаңа жетістіктер тіледі.

Жиын барысында марапаттау рәсімі өткізілді.

М.Бегентаев облыс әкімінің Құрмет грамоталары мен Алғыс хаттарын, «Қазақстан Республикасының Денсаулық сақтау ісіне қосқан үлесі үшін» және «Денсаулық сақтау ісінің үздігі» төсбелгілерін табыстады.

Сонымен қатар, "Павлодар облысының алтын скальпелі" аталымында Павлодар облыстық ауруханасының травматология бөлімінің меңгерушісі Нұрланов Серік Қапанұлы, "Павлодар облысының алтын фонендоскобы" аталымында Павлодар қаласының №5 емханасының жалпы тәжірибе дәрігері Евграшина Ольга Владимировна және т.б. марапатталды.