Қазақстанның құқық қорғау органдары қосымша мүмкіндіктерін пайдаланады

17 Маусым, 2016 11:48

Қазақстанның құқық қорғау және арнайы органдары азаматтардың қауіпсіздігін қамтамасыз ету үшін қосымша мүмкіндіктерін пайдаланады, деді ҚР Премьер-министрі Кәрім Мәсімов Қазақстан Республикасы Парламент палаталарының бірлескен отырысында.

«Бүгінгі мүмкіндікті пайдалана отырып, Елбасының тапсырмасы бойынша Ақтөбе облысына сапарыма тоқтала кеткім келеді. Менің ойымша, бүгінгі күні халықты ең бірінші кезекте қауіпсіздік мәселесі толғандырады. Бұған дейін, халық негізінен баспана мәселесіне, суға, газға қатысты тарифтерге, азық-түлік мәселесіне назар аударып келсе, қазір жұртты елдің ішкі қауіпсіздігі толғандыратыны анық білініп отыр», - деді К. Мәсімов.

Осыған орай, Үкімет басшысы Елбасының тапсырмасына сәйкес, жұмыс тобы құрылғанын атап өтті.

«Алдағы уақытта біз арнаулы органдар мен құқық қорғау органдарының мүмкіндіктерін толық қамтамасыз ету бағытында заңнамалық және бірқатар ресурстық өзгерістер бойынша Парламентке келетін боламыз. Қазақстан азаматтары өздерінің өмірі мемлекет тарапынан қорғалатынына сенімді болуы керек. Біз осыны қамтамасыз ететін боламыз», деді К. Мәсімов.

Еске сала кетейік, Астанада ҚР Парламент палаталарының бірлескен отырысы өтіп жатыр. Күн тәртібі бойынша ҚР Конституциялық Кеңестің жолдауы туралы «ҚР конституциялық заңдылықтың жағдайы туралы» және ҚР Үкіметі мен Есеп комитетінің 2015-ші жылдың республикалық бюджетінің орындалуын қадағалау туралы есебі қаралуда.

Индира Қауметова

Барлық жаңалықтар