Жамбыл облысында кәсіби-техникалық мамандықтарға мемлекеттік тапсырыс көлемі артты
Еркебұлан Құралбаевтың айтуынша, облыс бойынша 3 жоғары оқу орнында (2 мемлекеттік, 1 мемлекеттік емес) 12 724 студент оқуда. 2015-2016 оқу жылында 48 техникалық және кәсіптік білім мекемелерінде (25 - мемлекеттік, 23 – мемлекеттік емес) 27 701 студент 85 мамандық, 133 біліктілік бойынша білім алуда. Ал, 27 кәсіби-техникалық оқу орындарында 26 мамандық бойынша оқытудың дуальді жүйесі енгізіліп, оған 1951 студент қамтылды.
«Облыста биыл кәсіби-техникалық мамандықтарға мемлекеттік тапсырыс көлемі өсіп 3740 орын бөлінді. Екі мыңға жуық жастарымыз Отан алдындағы әскери борышын өтеуде. 2015-2016 жылында жоғары оқу орнын 4276 студент бітірсе, орта арнаулы оқу орнын 48 мамандық, 76 біліктілік бойынша 4147 студент оқуларын аяқтады. Өткен жылы орта арнаулы оқу орнын бітірген студенттердің 78,1 пайызы мемлекеттік тапсырыс аясында жұмысқа орналастырылған және жайластырылған»,- деді Е.Құралбаев.
Облыстағы 3 жоғары оқу орнында және 29 орта арнаулы оқу орнында жастар ісі жөніндегі комитет жұмыс жасайды (оның ішінде 19-ы мемлекеттік, 10-ы мемлекеттік емес орта арнаулы оқу орындарында). Сондай-ақ, 2016-2017 оқу жылында солтүстік өңірлердегі 30 техникалық және кәсіптік білім ұйымдарына 1050 (мемлекеттік білім беру гранты) грант бөлінсе, жоғары оқу орындарына 3162 мемлекеттік грант бөлініп отыр.
«Сонымен қатар, «Қазақстан 2020: болашаққа жол» Қазақстан Республикасының мемлекеттік жастар саясатының 2020 жылға дейінгі тұжырымдамасын, Тілдерді дамыту мен қолданудың 2011-2020 жылдарға арналған мемлекеттік бағдарламасы мен Тараз мемлекеттік педагогикалық институтының 2015-2020 жылдарға арналған Үштілді білім беруді дамыту Жол картасы бойынша Тараз мемлекеттік педагогикалық институты, облыс әкімдігінің тілдерді дамыту басқармасы мен облысы әкімдігі жастар саясаты мәселелері басқармасының арасында үшжақты меморандумға қол қойылды. Аталған меморандум аясында студенттерге қазақ, орыс, ағылшын тілдерінің деңгейлік курстары ұйымдастырылуда»,-деп қорытындылады спикер.
