«Атамекен» ҰКП төрағасы мен мүшелерінің құзыреті екі жылға ұзартылды
16 Маусым, 2016 11:24
«Атамекен» ҰКП төрағасы мен мүшелерінің құзыреті екі жылға созылды, яғни 2018 жылдың 25 маусымына дейін ұзартылды. Бұл туралы «Атамекен» ҰКП III съезінде мәлім болды.
«2014 жылдың 25 маусымында бірінші съезде палатаның құзыретіне екі жыл уақыт берілді. Басқарма мүшелерінің құзыреті 2016 жылдың 25 маусымында бітетінін ескеріп, қызметті 2018 жылдың 25 маусымына дейін ұзартуды жөн көрдік», - деді «Атамекен» ҰКП басқарма төрағасы Тимур Құлыбаев.
Делегаттар «Атамекен» ҰКП қызметін ұзарту туралы шешімді бірауыздан қолдады.
«Біз бүгін басқарманың баяндамасын тыңдадық. «Атамекен» палатасының бизнес пен адамдар арасында тиімді диалог болуы үшін бірқатар жұмыс атқарылды. Меніңше, бүгінде «Атамекен» елдегі кәсіпкерлер үшін баспанаға айналды», - деді ол.
Анар Тәңірқұлова
