Қ.Бишімбаев: «БЖК-2020» аясында ШОБ үшін өнеркәсіп саласында несиелік ставка 8%-дан көтерілмейді

14 Маусым, 2016 16:24

«Бизнестік жол картасы - 2020» аясында өңдеу өнеркәсібінде шағын және орта бизнес үшін несиелік ставка 8%-дан көтерілмейді, деді ҚР Ұлттық экономика министрі Қуандық Бишімбаев ҚР Үкіметінің кезекті отырысында.

«Қазіргі уақытта «Нұрлы жол» бағдарламасы аясында жыл соңына дейін, біздің бағалауымызша, 70 млрд. теңге мен қосымша дағдарысқа қарсы шараларды жүзеге асыру үшін Біріккен жинақтаушы зейнетақы қорынан бұдан бұрын да қарастырылған 85 млрд. теңге қаржы игерілмейді. Осыған орай, Мемлекет басшысының тапсырмасы бойынша, 155 млрд. теңге сомасындағы тұтас қаржы өңдеу өнеркәсібін жүргізетін шағын және орта бизнесті қолдауға бағытталмақ»,-деді министр.

Ведомство басшысы атап өткендей, бұл қаржы арқылы қол жетімді ставкамен несиелеуді қамтамасыз ету жоспарлануда. Бұдан бөлек ҚР ҰЭМ «Бизнестің жол картасына» бұл қаржыларды 5%-ға дейін субсидиялау жөнінде өзгеріс енгізуді ұсынды.

«Осылайша, кәсіпкерлер бұл қаржыны 8%-ға дейінгі ғана жылдық ставкамен ала алатын болады»,-деді Қ.Бишімбаев.

Ботагөз Айтжанова