Өскемен мен Семей қалалары спорт алаңдарымен қамтылады

14 Маусым, 2016 20:41

Спорт алаңдарын орнату аудан әкімдеріне Өскемен мен Семей қалаларын абаттандыру мәселелері қаралған кеңейтілген аппарат кеңесінде тапсырылды, деп хабарлады ШҚО ақпараттық орталығы.

Өскемен қаласын абаттандыру жұмыстары аясында «Street workout» үшін қажетті құрылғылары бар алаңдар жасалуда. Онда мүмкіндігі шектеулі адамдардың да спортпен айналысуына болады. Мұндай алғашқы алаң жақында Ертіс жағалуында қолданысқа берілген. Биылғы жазда облыс орталығында тағы да бес арнайы спорттық алаң орнату жоспарланып отыр. Семей қаласында мұндай құрылғыларды орнататын жеті орын белгіленген. Кеңес барысында облыс әкімі осы іспеттес спорт алаңдарының санын арттыру қажеттілігін атап өтті.

«Барлық аудан орталықтарында, Өскемен мен Семей қалаларының негізгі шағын аудандарында аталмыш алаңдарды орнату қажет. Бұл алаңдарды біздің жеке кәсіпкерлер шығарады», - деді Даниал Ахметов облыс әкімінің орынбасары Жақсылық Омар мен денешынықтыру және спорт басқармасының басшысы Елдос Чикеновке тапсырма бере отырып.

Айта кетсек, спорт алаңдарына арналған қондырғылар жасау ісі Өскемен қаласында қолға алынған.