Н.Назарбаев 128 мың түлекті диплом алуларымен құттықтады

«Бүгінгі күндері Қазақстанның барлық жоғары оқу орындарында іс-шаралар өтіп, онда жоғары оқу орындарын бітірген 128 мың жас қазақстандық дипломдарын қолдарына алуда. Мен барлық түлектерді оқуларын аяқтап, еңбек жолына түсулерімен құттықтаймын. Сіздердің биылғы оқуды аяқтап жатқандарыңыз Қазақстан тәуелсіздігінің 25 жылдығымен тұспа-тұс келді»,-деді Н.Назарбаев.

Мемлекет басшысының сөзінше, осы толқын жаңа технологиямен қиын бәсекелестік жағдайда Қазақстанды алға сүйрейтін болады.

«Сіздер қазір әлемдік экономикада, жаһандық әлемде не болып жатқанын көріп отырсыздар. Тек қана жанжал емес, сонымен қатар экономикада өте үлкен трублентті үдерістер жүріп жатыр. Дағдарыстан туындайтын жаңа экономикалық дағдарыста кімнің білімі артық болса, үздік білім алған болса солар ұтатын заман. Бұл білім – замануи әлемде ең құнды капитал»,-деді ҚР Президенті.

Еске сала кетейік, Назарбаев Университетінде студенттердің екінші легін түлету салтанатты шарасы өтіп жатыр. Биыл бұл ЖОО-ы 622 студентті түлетіп отыр, олардың 444-і бакалавриат бағдарламасы бойынша және 178 студент магистратура бағдарламасы бойынша тәмімдап отыр.

Индира Қауметова