Қазақстан Эквадорға жер сілкінісінен кейінгі зардаптарды жоюға көмек көрсетті

10 Маусым, 2016 16:32

БҰҰДБ-ң Нью-Йорктегі кеңсесінде Қазақстан Республикасы үкіметі мен халқының атынан Эквадор Үкіметі үшін 2016-шы жылдың сәуірінде болған жер сілкінісінен шеккен зардаптарды жюға және қалпына келтіруге қолдау көрсету мақсатында қаржылай көмекті тапсыру салтанаты болды.

Қазақстан тарапынан БҰҰ даму Бағдарламасы желісі бойынша қаржылай 50 000 АҚШ доллары көмек ретінде Эквадордағы жағдайды қалпына келтіру жұмыстарын жүргізіп жатқан ұйымға берілді, деп хабарлады ҚР СІМ-і.

«Қазақстан тарапынан жеткізілген көмек жергілікті әкімшілік аумақтағы отбасыларды күнделікті өмірін жақсартуға және Эквадор өңіріндегі кедейшіліктен зардап шегушілердің бұдан әрі тұрақты дамуына жіберіледі»,-делінген хабарламада.

Қазақстан осы жылдың сәуірінде Эквадордағы жер сілкінісінен қаза тапқандарға байланысты көңіл айтқан болатын. Эквадор мен БҰҰ өкілдері көмекті тапсыру салтанатында сын сағатта қол ұшын беріп, көмек көрсету еліміздің жауапкершілігі мен серіктестік қарым-қатынастың жарқын үлгісі екенін атап өтті. Сонымен қатар, халықаралық қоғамдастық тарапынан жоғары бағаға ие болды. Эквадор тарапы Қазақтынның берген көмегін шынайы ықылыспен қабыл алды.

Барлық жаңалықтар