• Басты
  • Әскери оркестрлердің «Бейбітшілік кернейі» атты фестивалі ғаламат плац-концертпен аяқталды

Әскери оркестрлердің «Бейбітшілік кернейі» атты фестивалі ғаламат плац-концертпен аяқталды

8 Маусым, 2016 20:04
«Астана Опера» мемлекеттік опера және балет театрының алдындағы алаңда ШЫҰ қатысушы мемлекеттері қорғаныс министрлерінің кеңесі шеңберінде «Бейбітшілік кернейі» фестивалінің ғаламат плац-концерті өтті, деп хабарлайды ҚР ҚМ-і.

ШЫҰ мүше мемлекеттері әскери үрмелі оркестрлерінің «Бейбітшілік кернейі» үшінші халықаралық фестивалінің ерекшелігі қатысушылардың қазақтың ұлттық нақыштағы әуездеріне аса мән беруі болды. «Біз концерттік бағдарлама және плац-концерт түрінде өнер көрсеттік. Бізді құшақ жая қарсы алды. Біз үшін бұл фестиваль өзіміздің мәдениетімізді көрсетіп қана қоймай, сонымен бірге тәжірибе бөлісу үшін жақсы мүмкіндік. Әлбетте, өзге елдің сахнасында әрбір оркестрдің өз өнерлерін ортаға салуы өте жауапты іс. Биылғы жылы біз өзімізбен бірге «Қара жорға» биін алып келдік. Қазақстан мен Қырғыз елінің халқы бұл әнге би билейді. Біз бұл нөмірді плац-концертімізге қосып,  осылайша, біздің халықтарымыздың бауырластығы мәңгі екендігін көрсеткіміз келді», - деді Қырғыз Республикасы Қарулы Күштері Бас штабы Армия орталық үйі әскери-көрсетпелі оркестрінің бастығы капитан Дастан Джуматай уулу. «Оркестрлердің дайындық деңгейі өте жақсы. Хас шеберліктеріне сөз жоқ. Біз қателіктер бойынша жұмыс жүргіземіз. Бірақ, осы фестивальға жоспарланған барлық дүниені орындап шықтық.  Бүгінде музыканттарымыздың дайындық деңгейі  жеткілікті дәрежеде. Біз – халықаралық фестивальдарға үнемі қатысып тұрамыз. Қазақстанның атын шығарып, жоғары деңгейді көрсетеміз. Осы жылы барлық күш-жігеріміз аталмыш фестивальға дайындалуға бағытталды. Сондай-ақ «Мәскеуде өтетін Спасск мұнарасы» фестиваліне қатысуды жоспарлап отырмыз», - деп ҚР ҚК ҰӘПО Орталық әскери оркестрінің бастығы аға лейтенант Алмас Ибрагимов алған әсерімен бөлісті. ШЫҰ қатысушы елдері әскери музыканттарының ғаламат байқауына Қырғыз Республикасы, Қытай Халық Республикасы, Ресей Федерациясы, Тәжікстан Республикасы мен Қазақстан Республикасы әскери оркестрлерінің жеке құрамы қатысып жатқанын айта кетейік. 


 

Барлық жаңалықтар