16 түлек 125 балл жинады – ҚР БҒМ

Тестілеу төртінші күні 47 ҰБТӨП-тің базасында өткізілді.

Тестілеудің төрт күнінде мүмкін болған 125 балды 16 бітіруші жинады, деп ҚР білім және ғылым министрлігінде хабарлайды.

Тестілеудің төрт күнінің нәтижесінде тыйым салынған заттарды қолданған және аудиторияда тәртіп бұзған үшін 37 бітіруші тестілеуден шығарылды.

2016 жылы 5 маусымда Республикалық апелляциялық комиссияның қарауына жалпы 105 өтініш келіп түсті. Оның ішінде 28 тест тапсырмасы қанағаттандырылды, яғни жалпы қолданған тест тапсырмаларының 0,55 %-ын құрайды.

«Сонымен қатар, тестілеудің үш күнінде (3, 4, 5 маусым аралығы) Республикалық апелляциялық комиссияның қарауына барлығы 384 өтініш келіп түсті. Оның ішінде 88 тест тапсырмасы қанағаттандырылды, яғни жалпы тестілеудің үш күнінде қолданған тест тапсырмаларының 0,2 %-ын құрайды»,-деп хабарламада айтылған.

Сонымен қатар, өту деңгейінен өте алмаған бітірушілер ағымдағы жылы қайта кешенді тестілеу тапсыру арқылы жоғары оқу орындарының ақылы негізде оқуға түсуге құқылы. Қайта кешенді тестілеуге қатысу үшін өтініштер жоғары оқу орындарының қабылдау комиссияларында тамыз айының 1-і мен 8-і аралығында қабылданады, ал тестілеу тамыз айының 19-ы мен 24-і аралығында өткізіледі.