Скрипкашы Ержан Күлібаев Нью-Йоркте өткен І Манхэттендік музыка байқауында жеңіске жетті

2 Маусым, 2016 20:41

Әлемге әйгілі қазақстандық асқан шебер скрипкашы, «Астана Опера» театрына шақырылған солист Ержан Күлібаев, 31 мамырда Нью-Йоркте аяқталған І Манхэттендік музыка байқауының ішекті аспаптар номинациясы бойынша Бірінші сыйлық (үздік) иегері атанды.

Халықаралық «Manhattan Music» байқауының мақсаты – әртістігімен, сахнадағы өзгеше дарындылығымен ерекшеленген орындаушыларды тауып, олардың халықаралық деңгейде өсуіне қолдау көрсету.

8 маусым күні жеңімпаз музыканттар әйгілі Карнеги-холл сахнасында (Нью-Йорк) болды. Халықаралық дыбыс жазатын «Orpheus» компаниясы әртістердің компакт-дискілерін жазып, таратуды өз мойнына алды. Олардың дыбыс жазуына авторлық құқық және жеке қолданысына 1000 дана күйтабақ беріледі. Бұл – жеңімпаздар үшін ең үлкен марапат. Сондай-ақ, әртістердің есімі, жаңадан құрылған дүние жүзіндегі классикалық музыканттардың мүддесін қолдайтын «Manhattan Internationai Artists» агенттігінің тізіміне енеді.

«Әртістер тарапынан артық шығын шықпау үшін, байқау қатысушылар жіберген бейнежазбалар арқылы өткізілді. Орындаушылардың жасы 35 аспауы талап етілді. Байқау фортепиано, вокал және ішекті аспаптар аталымдары бойынша өтті. Беделді қазылар құрамына аты аңызға айналған пианиношы Иво Погорелич төрағалық етті»,-деп хабарламада айтылған.

Ержан Күлібаевтің Америкадағы бұл жеңісі – бұғанға дейінгі сансыз жетістіктерінің бірі ғана. Бармағынан бал тамған жас срипкашының Буенос-Айрес, Лиссабон, Берлин, Новосібір және Екатеринборда өткен халықаралық байқаулардан алған бес жүлделі сыйлықтары бар.

Барлық жаңалықтар