ЭКСПО-2017 көрмесінде 5 мың медицина қызметкері жұмыс істейтін болады

31 Мамыр, 2016 19:08

ЭКСПО-2017 халықаралық мамандандырылған көрмесінде халықаралық стандарттарға сай оқытылған мамандар – дәрігерлер, координаторлар және басқа да медицина қызметкерлері жұмыс істейтін болады. Бұл туралы «Астана ЭКСПО-2017» ҰК» АҚ және «Медикер» ЖШС арасындағы ынтымақтастық меморандумына қол қою барысында айтылды.

«Астана ЭКСПО-2017» ұлттық компаниясының Басқарма Төрағасы Ахметжан Есімов халықаралық қатысушылар мен Көрме қонақтары үшін медицианалық көмек көрсету деңгейін жаңа технологияларды пайдалана отырып, барынша сапалы әрі тиімді ету керектігін атап өтті.

«Қазақстандағы медициналық қызмет көрсететін ірі компаниялардың бірі ЭКСПО-2017 көрмесінің жоғарғы деңгейде өткізілуіне атсалысуы біз үшін маңызды. «Медикер» ЖШС Қазақстан бойынша кең тараған филиалдық жүйесі бар. Сондықтан бұл Көрменің республикалық деңгейде маңыздылығын көрсетеді», - деді Ахметжан Есімов.

Келісім аясында «Медикер» ЖШС көрмеге 800 миллион теңге инвестиция салмақшы. Инвестицияның ауқымды бөлігі Көрме аумағында медицина орталығын және 6 медбекетін қамтамасыз етуге жұмсалатын болады.

«Біздің компания Көрменің медициналық серіктесі атанғандығын мәртебе тұтатыд. Бұл бізге деген сенімділікті білдірсе керек. Әрі бұл біз үшін үлкен жауапкершілік. Өз тарапымыздан Меморандумда көрсетілген барлық талаптарды уақытылы әрі сапалы орындайтындығымызға кепіл береміз», - деді «Медикер» компаниясының басшысы Гүлжан Садырбаева.

Барлық жаңалықтар