ШҚО әкімі аймақтың дарынды балаларымен кездесті

31 Мамыр, 2016 09:13

Оқуда, шығармашылық пен спортта жақсы көрсеткішке ие болып, үздік атанған 25 оқушы партияның облыстық филиалының төрағасы, облыс әкімі Даниал Ахметовпен кездесті. Аймақ басшысы жеткен жетістіктері үшін балаларға планшеттер табыстады, деп хабарлады ШҚО әкімдігі.

Қазақстан Республикасы Тәуелсіздігінің 25-жылдығына орай Өскемен қаласында «Бақытты балалық шақ» партиялық жобаны іске асыру мақсатында «Нұр Отан» - балаларға» республикалық акциясы өтуде.

25 жылдыққа облыстың барлық аудан мен қалаларынан 25 дарынды баланың шақырылуы символикалық мәнге ие. «Нұр Отан» партиясының облыстық филиалының төрағасы Даниал Ахметов кездесу барысында балаларды Халықаралық балаларды қорғау күнімен құттықтап, оқуда сәттілік тіледі.

Балалар өз кезегінде шығармашылық қабілеттерін паш етті. Өскемен қаласының №3 мектеп оқушысы Ерболұлы Еркебұлан Мұқағали Мақатаевтың «Отан» өлеңін оқыса, Алматыда өткен республикалық балалар шығармашылығы байқауының жеңімпазы Айым Советова «Сал күрең» күйін шертіп берді.

Кездесу соңында Даниал Ахметов оқудағы үздік көрсеткіші және түрлі спорттық жарыстарға қатысқаны үшін балаларға планшеттер табыс етті.

Одан кейін нұротандықтар балаларды Өскемен қаласының мәдени және спорттық нысандарымен, Абай Құнанбайұлы ескерткішімен, Дақ монументімен таныстырып өтті.

Айта кетсек, «Бақытты балалық шақ» партиялық жобасының басты мақсаты ана мен баланы қорғау, отбасылық құндылықтарды одан әрі нығайту, отбасындағы бала құқығын қорғау.

Барлық жаңалықтар