«Протон-М» зымыран тасығышының құлағанынан тиген зардап көлемі 13,6 млрд теңгеден асты

«ҚР Қоршаған ортаны қорғау және су ресурстары министрлігі 2013 жылдың 2 шілдесінде Қазақстан жеріне құлаған «Протон-М» зымыран тасығышының қоршаған ортамызға тигізген зиян көлемін экономикалық бағалады. Келтірілген залалдың қаржылай құны 13,6 млрд теңгеден асты (13 690 747 305 теңге)», - делінген хабарламада.

Аталмыш мәлімет РФ Федералды ғарыш агенттігіне (Роскосмос) жөнелтілді.

Қазақстан Республикасы мен Ресей Федерациясының Үкіметі арасындағы «Байқоңыр» кешенін жалдау келісіміне сай, қазақстандық тараптың жұмыс координацтясын жүргізуге құзіретті орган Қазкосмос болып табылады. 

Естеріңізге сала кетейік, ҚР Үкімет басшысының бұйыруымен Қоршаған ортаны қорғау және су ресурстары министрі Ерлан Қаппаровтың төрағалығымен 2013 жылдың 2 шілдесіндегі «Протон-М» зымыран тасығышының құлауынан тиген экологиялық зардапты жою үшін атқарылатын шараларды бақылау мақсатында жұмыс тобы құрылды.

Жұмыс тобының бір отырысында Роскосмос өкілдері экологиялық зардап тигізгені үшін Қазақстан жағына экономикалық шығынды өтеуге дайын екендіктерін мәлімдеді.

«Қазіргі таңда аймақтың ластануын тоқтату жұмыстары мен қоршаған ортаны қалпына келтіру жұмыстары аяқталды. Жайылған гептилдің дәрежесі зиянды дәрежеге дейін жетпейді», - делінген хабарламада.