• Басты
  • Ақтөбеде ҰБТ тапсыратын жаңа пункт ашылды

Ақтөбеде ҰБТ тапсыратын жаңа пункт ашылды

16 Мамыр, 2016 15:49
Ақтөбе облысының әкімі Бердібек Сапарбаев Ақтөбе қаласында ашылған жаңа Біріңғай ұлттық тест тапсыратын пункттің салтанатты ашылуына қатысты. Аталмыш пункт «100 нақты қадам» Ұлт жоспарын жүзеге асыру аясында және ҚР Тәуелсіздігінің 25 жылдығына орай ашылады, деп хабарлады «Ақтөбе ақпарат» орталығы.

2016-шы жылы ақтөбелік мектеп бітірушілер ҰБТ-ті жаңа пунктте тапсырады. Мұнда тест тапсырушыларға барлық қолайлы жағдайлар жасалған. Жаңа пунктте барлық аудиториялар санитарлық-гигиеналық және техникалық талап нормаларына сай.

Б.Сапарбаев Мемлекет басшысының білім саласының дамуына, қазақстандықтардың бәсекеге қабілетті болуына ерекше назар аударатынын атап өтті. Сондай-ақ ол өскелең ұрпақтың жақсы білім алуы үшін жыл сайын жаңа білім нысандары пайдалануға беріліп жатқанын да тілге тиек етті.

«Оқушылардың білім сапасын арттыру, үш ауысымда оқытатын және апатты жағдайда мектептерді жою, балабақшалар салу – бұл басым міндеттер. Аймақта соңғы үш жылда білім саласын дамытуға 164 млн. теңгеден астам қаржы бөлініп, 6 910 орынды қамтитын 30 жаңа мектеп салынды. Бүгін ҰБТ тапсыратын жаңа пункт пайдалануға беріледі. Мұнда мектеп бітірушілер үшін барлық жағдай жасалған. Аталмыш пунктте биыл мектеп бітіретін Ақтөбе қаласының 23 мектебінің 1 058 оқушысы бекітілді. Олардың 878-і ҰБТ тапсыруға өтініш берген. Соңғы 5 жылда Ақтөбе облысының мектеп оқушылары білім сапасының жоғарлағанын көрсетіп келеді»,-деді Б.Сапарбаев.

Облыс әкімі салтанатты шарада мектеп бітірушілердің жетістігі педагогтардың қызметіне көп байланысты екенін де атап өтті.

Аймақ басшысы оқушылардың психологиялық дайындығы Ұлттық біріңғай тест тапсыруда маңызды аспект екенін еске салды. Б.Сапарбаев ұстаздар ата-аналар сияқты балаларға емтихан кезіндегі күйзелістен шығулары үшін барынша жағдай жасаулары керек, деп ескертті. 

Барлық жаңалықтар