ҚР ДСӘДМ-де ҚР тәуелсіздігінің 25 жылдығына арналған «Отаным – алтын бесігім» байқауы өтті

Шараның мақсаты – мемлекеттік органда тіл саясатын жүзеге асыру, Қазақстанның бірлігін мен ынтымағын паш ету, қазақ тілін іс-қағаздар жүргізу ісі мен күнделікті өмірде қолдану аясын кеңейту болып табылады.

Байқауға қатысу үшін орталық аппарат қызметкерлері арасынан екі топ құрылды. Қатысушылар еліміздің тарихы мен мәдениеті, салт-дәстүрі бойынша білімдерін ортаға салды.

Әділ қазылар алқасының төрайымы ҚР ДСӘДМ Жауапты хатшысы Аида Құрманғалиева шараны қорытындылай келе, Қазақстан Елбасы Нұрсұлтан Назарбаевтың басшылығымен экономиканы жан-жақты дамытып, әлеуметтік саланы нығайтумен қатар, демократиялық өзгерістерді сәтті жүзеге асырып келе жатқанын атап айтты.

 «Ел тәуелсіздігінің 25 жылдығы – көпұлтты Қазақстан тарихындағы маңызды оқиғалардың бірі! Біз болашаққа зор сеніммен қараймыз. Республиканың әрбір тұрғыны ел азаматы екенін мақтан тұтады», - деді Аида Құрманғалиева.

Байқау нәтижесі бойынша жеңіске жеткен топ бағалы сыйлықтармен, екінші топ – ынталандыру сыйларымен марапатталды.