Жаңатас қаласында 280 орындық балабақша салынуда
14 Мамыр, 2016 10:02
Жаңатас қаласында 280 орындық балабақша салынуда. Бұл туралы Өңірлік коммуникациялар қызметінде «Моноқалаларды дамытудың 2012-2020 жылдарға арналған бағдарламасын» іске асыру барысы туралы өткен брифингте Жаңатас қаласының әкімі Шалбаев Дәурен Асембайұлы баяндады.
Пушкин көшесінің бойындағы балабақшаның орнын тазалау жұмыстары жүргізіліп, қазіргі таңда 280 орындық балабақша салу жұмыстары басталды. Құрылыс жұмыстарын «Арай-Строй-Маркет» ЖШС атқарып жатыр. Құрылыс жұмыстары биылғы жылы аяқталып, қыркүйек айында іске қосылуы жоспарланып отыр. Сонымен бірге мемлекеттік жеке меншік әріптестік бағытында 80 орындық жеке балабақша ашылады.
500 адамға арналған «Қалалық мешіт» құрылысын аяқтап, маусым айында тұрғындар игілігіне берілетін болады. Наурыз-сәуір айларында «Жасыл ел» бағдарламасы аясында 5500 тал көшеті егілді. «Еврохим тыңайтқыш» ЖШС тарапынан Жаңатас қала ішінен өз қызметкерлеріне коттедж қалашығын салуға ЖСҚ дайындауда. Сонымен қатар осы Еврохим қалашығына жастар комплексін салу жоспарлануда.
