ШҚО-да 2016-шы жылдың 4 айында медиаторлардың қатысуымен 2263 іс қаралған
13 Мамыр, 2016 19:21
«Медиация туралы» Заң қабылданғалы бері Шығыс Қазақстан облысында сот істерін қарау барысында татуластыру тәжірибесі кеңінен енгізіле бастады. 2016-шы жылдың 4 айының өзінде 2263 іс медиаторлардың қатысуымен қаралған. Облыстық Достық Үйінде республика бойынша бірінші медиация кабинеті мен оқыту орталығы ашылған.
ШҚО облыстық сот төрағасы Досжан Амировтың айтуынша, аймақта көпжақты дау шешімінде медияция қолданылады. 2014-ші жылы медияциялық жолмен барлығы 2094 іс жабылса, 2015-ші жылы 3577 іс қаралған. Осы жылдың 4 айының қорытындысы бойынша барлығы 31584 істің 2263-і медиаторлардың қатысуымен аяқталған.
ШҚО ақпарат орталығының хабарлауынша, Абай ауданында мәмілегерлік процедурасын кешенді түрде енгізу тәжірибесін жүргізу басталды. Онда кәсіби емес медиаторлардың белсенді қатысуына маңыз беріліп отыр. Яғни, өмірлік тәжірибесі бар көпті көрген ақсақалдар алқасының мүшелері тараптардың мәселесін мәмілегерлік жолмен шешпек.
