Қазақстанда шет тілдерін үйренуге мүмкіндік жеткілікті - сарапшы

«Біз әлемдік экономикалық жүйемен ықпалдасқанбыз. Жаһандану кері айналмайтын үдеріс. Үш тілде білім беру бағдарламасы өте қажет. Қазақ және орыс тілі – бұл біздің өміріміздің бір бөлшегі. Ағылшын тілі – бұл ғылымның тілі»,-деді Амантай Нұрмағамбетов.

Оның айтуынша, Қазақстанда шет тілдерін үйренуге мүмкіндіктер жеткілікті.

«Ағылшын тілін бастауыш мектептерде оқытса, сонда тиімді болады. Өйткені бала тез үйренеді. Қазір жастардың басым көпшілігі ағылшын тілін біледі. Алғаш «Болашақ» бағдарламасы басталғанда дайын адамдарды табу қиын болатын. Ал, қазір үлкен бәсекелестік бар. Ертеректе шет тілін үйренуге ешқандай ынта да болмаған, қазір әлем ашық. Ұтқырлық процесі өте үлкен»,-деді А.Нұрмағамбетов.

Қазақстандағы үш тілділік туралы Президент Нұрсұлтан Назарбаев ресми баяндамаларында, биік мінберде сөйлеген сөздерінде жиі айтып жүр. Әсіресе, 2015-ші жылы өткен Қазақстан халқы Ассамблеясының ХХІІ-ші сессиясында да ерекше тоқталды. Айта кету керек, ең алғаш рет Мемлекет басшысы бұл идеяны 2006-шы жылдың қазан айында Қазақстан халқы Ассамблеясының ХІІ-ші сессиясында айтқан болатын. Онда Елбасы біздің балаларымыздың болашағы үшін кем дегенде үш тілді меңгерту маңызды екенін ескерткен еді.

Ботагоз Айтжанова