Н.Назарбаев пен «Шеврон» компаниясының директорлар кеңесінің төрағасы корпорацияның кенішті игеруге қатысу мәселесін талқылады
Кездесу барысында Қазақстан мен «Шеврон» компаниясының мұнай және газ саласындағы ынтымақтастығы , бірлескен жобаларды жүзеге асыру, сондай-ақ корпорацияның кенішті игеруге қатысу аясын кеңейту мәселелері талқыланды.
Елбасы Қазақстан үшін «Шевронның» маңызды серіктес екенін атап өтті.
«Біз етене жақын достармыз. Ынтымақтастығымыз өзара тиімді. Сіздің компанияны біз басқа мердігерлерге үлгі етеміз. Қазір күрделі кезеңді бастан өткеріп жатырмыз. Бұрын шикізат бағасы тым жоғары болғандықтан шалқып өмір сүрдік. Бүгінде баға әлдеқайда көңілге қонымды. Сондықтан бізге жаңа бағамен және үлкен өндіріс көлемімен өмір сүріп үйрену керек», – деді Нұрсұлтан Назарбаев.
Қазақстан Президенті «Шеврон» компаниясының елімізде қызмет жасағалы бері бюджетке 113 миллиард доллар төлегеніне, сондай-ақ әлеуметтік инфрақұрылымды жақсартуға бағытталған бірқатар ауқымды жобаларды жүзеге асырып жатқанына назар аударды.
«Теңізшевройл» қызметкерлерінің 85%-ы – қазақстандықтар, барлық буын басшыларының 73%-ы – еліміздің азаматтары. Бұл басқа инвесторлар үшін жақсы өнеге, – деді Мемлекет басшысы.
Дж.Уотсон өз сөзінде елдегі қолайлы инвестициялық ахуалға қолдау көрсеткені және саланы дамытуға көңіл бөліп отырғаны үшін Нұрсұлтан Назарбаевқа алғыс айтты.
«Мен қоршаған ортаны қорғау және өндірістегі қауіпсіздік мәселелеріне Сіздің зор көңіл бөлетініңізді білемін. Біздің кәсіпорын осы көрсеткіштер бойынша әлемдегі үздіктердің бірі. Биыл біз Теңіз кенішінде күрделі жөндеу жүргіземіз, одан кейін күкірт қалдығы қоршаған ортаға таралмайтын болады», – деді «Шеврон» компаниясының басшысы.
Дж.Уотсон қазақстандық өнім үлесін ұлғайту компания қызметінің басымдығы бар бағыты болып қала беретінін, қазіргі кезде оның көлемі 20 миллиард доллар болып отырғанын айтты.
