Алматы-1-Шу екінші теміржол телімінде көпірлер салына бастады

Алматы-1-Шу екінші темір жол телімінің құрылыс жобасын «Нұрлы жол» бағдарламасы аясында «Қазақстан темір жолы» ҰК» АҚ атқаруда.

Қазіргі таңда басқа да Қопа, Ұзынқарғалы, Қаскелең, Жынкелді, Казачка, Ақсай өзендерінің үстіне көпір орнату жұмыстары басталып кетті.  Төрт көпірдегі 76 қазықтың орнын қазып, бетондау жұмыстары орындалды. Отар-Шилібастау телімінде су өткізу құбырының темірбетон қаусырмасы құрастырылды. Көпірлердің құрылыс орнына  2145,8 текше метр темір бетон құбырлары, 24 дана көпірдің темірбетон аралық құрылыс материалдары дайындалып, 15 су өткізу құбырлары жөнделді.

Құрылыс жұмыстары пойыздардың қозғалысына қарамастан, пайдаланымдағы көпірлер мен жұмыс істеп тұрған телімнің іргесіндегі екінші жолда жасалуда. Барлық желі бойында 90 жасанды имарат тұрғызылатын болады.

Атап өтуге тұрарлығы, тағы да  қолданыстағы 12 көпірге жаңа технология бойынша  жаңғырту жұмыстары жүргізіледі. Бұл құрылыс жұмысының құнын төмендетіп, орындалу мерзімін 30 пайызға қысқартады.

Екінші темір жол желісінде Алматы облысының Қарасай ауданы аумағында кешенді автокөлік көпірін орнату жоспарланып отыр.

Құрылысшылар 110 шақырымдық магистральдық жол төсейді.

Қазіргі таңда құрылыс жұмысына 46 дана техника мен 94 жұмысшы тартылған. Науқан қызған кезде жұмысшылар саны да артатын болады. Жобаны жүзеге асыру кезінде 1500 жұмыс орны ашылады деп күтілуде.