Сенат депутаттары мен шаруа қожалықтарының қызметкерлері балық шаруашылығын дамыту мәселесін талқылады
Сенаторлар Махамбет ауданындағы Ақтоғай ауылы мен Индер ауданындағы Өрлік ауылында болып, аудан басшылығымен, аудандық мәслихат депутаттарымен және бірнеше шаруа қожалықтарының еңбеккерлерімен кездесті. Жүздесу барысында Мемлекет басшысының «Нұрлы жол» бағдарламасы мен бес институттық реформасын іске асыру жөніндегі «100 нақты қадам» Ұлт жоспарын жүзеге асыру жөніндегі Сенаттың заң шығару жұмысы туралы таныстырылды.
Сондай-ақ Қазақстан халқы Ассамблеясының сессиясында қабылданған «Мәңгілік ел» патриоттық актісінің маңызы туралы айтылды. Депутаттар Атырау қаласы аймағындағы Бекіре балық өсіру зауытының ұжымымен кездесу барысында еліміздің 2016-2018 жылдарға арналған республика бюджетіне енгізілген өзгерістер мен толықтыруларға тоқталып, балық шаруашылығын өркендетудің өзекті мәселелері туралы ойларын ортаға салды. Сенаторлар алдағы күндерде Х.Досмұхамедов атындағы Атырау мемлекеттік университетінің студенттерімен, профессорлық-оқытушылар құрамымен кездесуді жоспарлап отыр.
Парламент Сенатының депутаттары Асқат Күзеков, Манап Көбенов пен Владимир Бобров Павлодар облысында жұмыс бабындағы сапармен болды. 3 мамырда сенаторлар А. Күзеков пен М. Көбенов Баянауыл ауданындағы қоғам қайраткерлерімен, ақсақалдарымен, әкімдік қызметкерлерімен және кәсіпорындар басшыларымен кездесу барысында Жер кодексіндегі жаңалықтар туралы әңгімелеп, жер қатынастарына қатысты өзекті мәселелерді түсіндірді. Сенаторлар А. Күзеков, М. Көбенов және В. Бобров таяу күндері Ақтоғай, Ертіс және Павлодарский аудандарына барады.
