Қызылорда облысында күріш егу науқаны басталды – әкімдік

27 Сәуір, 2016 10:04

Сырбойылық шаруалар күріш егуді қолға алды.Өңір диқандары 76 мың гектар жерге Сыр маржанын сеппек. Көктемгі дала жұмыстарына тас-түйін дайындықпен кіріскен шаруашылықтар шілде, тамыз айларында болуы мүмкін су тапшылығына алаңдайды, деп хабарлады облыс әкімдігі.

Дән себуді алғаш болып аймақтың оңтүстік аудандары бастады. Ерте көктемнен топырақ тыңайтып, Жер ананы идіруге кіріскен диқан қауым күздігүні қамба толтырудан үмітті.

«Ішкі шаруашылық каналдарды, магистралдық каналдарды жөндеу, гидропосттарды қалпына келтіру, биік жерге су жетпей жатса, су сорғыштарын дайындау жөнінде тапсырма берілген. Сол жұмыстар қазір өз деңгейінде жүргізілуде. Жалпы көктем айы өте жаңбырлы болуына байланысты да қазірден Шардараға 4,8 млрд текше метр су жиналып отыр. Оның үстіне Көксарайға 2,4 млрд текше су жиналып, қазір барлығы 7,2 млрд текше су болып тұр. Енді біздің егістік үшін барлығы 4,1 млрд текше су қажет. Су жеткілікті болады деп есептеп отырмыз», - деді облыстық ауыл шаруашылығы басқармасының басшысы Бақыт Жаханов.

Суармалы егістік бойындағы гидротехникалық құрылғылардың 3/2-сі қолданысқа жарамсыз еді. Осы орайда су жеткізуші 30-дан астам канал арнасы тазаланды. Егіс басында тер төккен диқандар мамыр басындағы мейрамдарда да тыным таппай, алдағы айдың ішінде толық тұқым сеуіп, суға бастыруды көздейді.

Барлық жаңалықтар