Шымкенттік спортшы Риодағы Олимпиадаға жолдама ұтып алды
22 Сәуір, 2016 19:11
Оңтүстік Қазақстан облысының қоржыны тағы бір жолдамамен толықты. Шымкенттік спортшы Сабина Әшірбаева таяуда өткен Бразилиядағы лицензиялық чемпионатта 69,5 балл жинап, бірінші орын алды, деп хабарлады облыс әкімдігінің баспасөз қызметі.
Спортшы Австрия, Германия, Италия мен Финляндияның гимнасшыларынан оза шауып, үздік атанды. Осылайша, Бразилияның Рио-де-Жанейро қаласында өтетін жазғы ХХХІ олимпиада ойындарына қатысатын облыс спортшыларының саны 15-ке жетті.
Олимпиада жүлдесіне үміткер ретінде еліміздің намысын жалғыз өзі қорғайтын көркем гимнасшы үшін бұл алғашқы олимпиада ойыны болып отыр. Енді Сабина Риода өтетін ХХХІ олимпиада ойындарында қайта топты жару үшін тыңғылықты дайындыққа көшетін болады.
Естеріңізге салайық, Азияның абсолюттік чемпионы Әлия Юсупованың бапкерлігімен жарыстарға дайындалып жүрген Сабина былтыр Инчхонда өткен Азия ойындарында қола медальге ие болған еді.
