Астанада Еуразия медиа форумы өз жұмысын аяқтады
22 Сәуір, 2016 13:57
Бүгін Астанада XIII Еуразия медиа форумы-2016 жұмысын тәмамдады. Форум соңында ЕАМФ ұйымдастыру комитетінің төрайымы, ҚР премьер-министрінің орынбасары Дариға Назарбаева сөз сөйледі.
«Өзгелерден бөлініп, оңашалана бергенше, арадағы кедергі-тосқауылдарды жойған дұрыс. Сандық коммуникация мен интернет дүбірлеп тұрған дәуірде айналысынан қол үзіп, бөлектенген мемлекеттің дамуы екіталай. Қызықты пікірталас пен жаңа көзқарастарыңыз үшін баршаңызға алғыс айтамын», - деді Д.Назарбаева.
Сондай-ақ Д.Назарбаева келесі, XIV Еуразия медиа форумы Астанада «ЭКСПО-2017» көрмесі ұйымдастырылатын орындардың бірінде өтетінін атап өтті.
«Келер жылы Қазақстан ЭКСПО көрмесін өткізеді. Келесі форумның 2017 жылдың 22-23 маусымында ЭКСПО көрмесі орындарының бірінде өтетінін қуана хабарлаймын», - деді ол.Бүгін форум қонақтары мен спикерлері Бүкіләлемдік көрме нысандарын аралайды деп күтілуде.
