Мемлекет басшысы Азаматтық іс жүргізу кодексін әзірлеуді тапсырды

 «Азаматтық сот өндірісін жаңғырту қажет. Үкіметке Жоғарғы Сотпен бірлесіп, жаңа азаматтық іс жүргізу кодексін әзірлеуді тапсырамын. Азаматтық істі қарау реті процесс тараптары үшін ыңғайлы әрі жедел болуы тиіс. Онда заманауи технологияларды кеңінен пайдалану қажет», - деп атап өтті Мемлекет басшысы.

Сондай-ақ, Елбасы қайта қарауды талап ететін жағдайларды айырудың негізделген әдістемесін жасау қажет деп есептейді.

«Сот шешімін қайта қарауды қажет ететін жағдайларды айырудың негізделген әдістемесін жасап, енгізу қажет. Барлық сот жаңа заңнама аясында жұмыс істеуге бейімделіп, істің жедел, заңды, әділ қаралуын қамтамасыз етулері тиіс. Оған судьялар да, сот төрағалары да бірдей жауапты», - деп ескерді Н.Назарбаев. 

«Барлық судьяларды видеоконференция жүйесінің бірінші инстанциясымен қамтамасыз ету керек. Бұл әділ сотты қалыпты режимге қояды», - деді Н. Назарбаев.