ҚР өңірлерінде ДНК зертханалары ашылады – М. Демеуов
20 Қараша, 2013 15:59
ҚР өңірлерінде ДНК зертханалары ашылады. Бұл туралы Орталық коммуникациялар қызметінің баспасөз отырысында Ішкі істер министрінің бірінші орынбасары Марат Демеуов мәлім етті.
«Астана мен Алматыда ДНК-зертханалары бар. Енді басқа өңірлерде де осындай зертханалар құру жоспарлануда. Бүгінгі таңда 16 мобилдік криминалистік зертхана, дактилокарталарды қашықтықтан енгізуге мүмкіндік беретін 120 «Папилон» мобилдік дактиолоскопиялық кешені, криминалист маманға арналған 100 шақты автоматтандырылған жұмыс орны сатып алынып отыр», - деді М. Демеуов.
Демеуовтың айтуынша, заманауи зерттеу әдістерін енгізу, зертханалық базаны дамыту, сотталғандардың ДНК- сынамаларының және оқиға орындарынан алынған ДНК-биологиялық іздердің мәліметтер базасын жасау жөніндегі шаралар қабылдануда.
Сондай-ақ, М. Демеуов ағымдағы жылы геномды физика-техникалық зертхана ашылғандығын айтты.
