Алматы облысында 12 жемдеу алаңы іске қосылады
18 Сәуір, 2016 19:53
Алматы облысында ірі қара мал саны бір млн. бастан асты, оның ішінде асыл тұқымды мал басының үлесі 18,3%-ке жетті және бұл көрсеткіш жыл сайын артуда, деп атап өтті облыс әкімі Амандық Баталов Өңірлік коммуникациялар қызметінде өткен брифинг барысында, деп хабарлайды Алматы облысы әкімінің баспасөз қызметі.
Облыс басшысының айтуынша «100 нақты қадамның» 61-қадамын орындау мақсатында өңірде ауқымды шаралар атқарылуда.
Бүгінгі таңда 19,0 мың басқа алты ірі жемдеу алаңы жұмыс жасайды, оның ішінде үшеуі - «ӨтесБиоАзия» ЖШС, «Жақсылық» ШҚ және «Империя Фуд» ЖШС 67 шаруа қожалықтарын үш кооперативке біріктіруде.
Үстіміздегі жылы 16,9 мың басқа тағы 12 жемдеу алаңы іске қосылады.
Екі ет өңдеу зауытының құрылысы басталады. Олар - қуаты 8 мың тонна болатын ирандық «Империя Фуд» компаниясы және Қарасай ауданында қуаты жылына 10 мың тонна болатын «Үміт» ЖШС. Соның нәтижесінде жыл қорытындысы бойынша ет өндірісі 14,6 мың тоннаға артып, 330,4 мың тоннаға жетеді.
