Қазақстанның әскери теңізшілері Бахрейн Корольдігінде теңіз инфрақұрылымының мәселелерін талқылады (ФОТО)

15 Сәуір, 2016 18:53

Қазақстан Республикасы мен АҚШ қорғаныс ведомстволары арасында екіжақты ынтымақтастық шеңберінде ҚР ҚК ӘТК-нің бас қолбасшысы контр-адмирал Жандарбек Жанзақов теңіз инфрақұрылымының қауіпсіздігі жөніндегі халықаралық симпозиумға қатысты. Бүгінгі таңда теңіз инфрақұрылымы мәселесі өте көкейкесті, деп хабарлады Қорғаныс министрлігі.

Жаһанның көптеген елдері лаңкестердің, қарақшылардың тарапынан қауіп-қатерлерге душар болып отыр. Осы қатерді болдырмау және сауда кемелерінің теңізде жүзу қауіпсіздігін қамтамасыз ету үшін теңіз компанияларына Әскери-теңіз күштері және жағалық күзетпен тығыз қарым-қатынаста болу қажет.

Конференция барысында 30 елдің Әскери-теңіз күштерінің өкілдері, 20-дан аса компания және әскери-теңіз саласындағы 30-дан аса маман осы және өзге де мәселелерді талқылады. Одан басқа, сапар барысында ҚР ҚК ӘТК бас қолбасшысы бесінші флоттың қолбасшысы вице-адмирал К. Донеганмен кездесті.

Кездесуде ҚР ҚК ӘТК әскери қызметшілерінің АҚШ ӘТК 5-ші флотының корабльдерінде практикадан және тағылымдаман сәтті өтуі, сондай-ақ олардың әртүрлі конференцияларға, форумдар мен симпозиумдарға қатысуы талқыланды. Сонымен қатар, екі елдің әскери қызметшілері АҚШ ӘТК-нің «Proud Lions» корабліне барды. Бүгінгі таңда шетелде ҚР Әскери-теңіз күштерінің болашақ әскери қызметшілері атанатын 50-ден аса қазақстандық курсант білім алып жүргенін айта кетейік.

Барлық жаңалықтар