Ақмола облысында 19 тілдерді үйрету орталығы жұмыс істейді

15 Сәуір, 2016 09:32

Республика бойынша тілдерді үйрету орталығы бар-жоғы 50 болса, Ақмола облысында осындай 19 орталық жұмыс істейді. Оның ішінде Ақмола облысында 17 орталықта қазақ тілі мен ағылшын тілі үйретіледі. Қалғандары тек мемлекеттік тілді үйрететін орталықтар. Бұл туралы «Ақмола Медиа Орталығында» өткен брифингте Ақмола облыстық тілдерді дамыту басқармасының бастығы Арман Бердалин хабарлады.

А.Бердалин Ақмола облысында 2011-2020 жылдарға жоспарланған тілдерді дамыту мемлекеттік бағдарламасының қалай жүзеге асып жатқаны туралы айтты.

Оның айтуынша, соңғы 4 жылда орталыққа келіп тіл үйренушілер 2 есеге артқан.

2015-ші жылы 1 427 адам сертификат алған. Олардың 611-і мемлекеттік қызметкерлер. Жалпы бүгінгі таңда сертификат алғандар саны 5 306 адам.

Тілдерді дамыту мемлекеттік бағдарламасында қазақ тілін үренемін деуші кез-келген адамға тегін курс ашу қарастырылған. Қазір дәл сондай курс 12 орталықта жүреді.

Бүгінгі күні облыста 183 балабақша жұмыс істейді. Олардың 56-сы қазақ тілінде, 100-і аралас тілде, 27-і орыс тілінде тәрбиелейді.

Дәл қазір облыста 578 жалпы білім беретін мектеп бар. Олардың 166-ы қазақ мектебі, 223-і аралас, 189-ы орыс тілінде білім беретін мектептер.