Алматы-1 вокзалында «Surdo-online» іске қосылады
14 Сәуір, 2016 14:48
Алматы-1 вокзалында «Surdo-online»әлеуметтік жобасы іске қосылмақ, деп хабарлады «ҚТЖ» ҰК» АҚ баспасөз қызметі.
«Вокзал-қызмет» АҚ жүзеге асырған бұл жоба пилоттық болып табылады. Сервистің жаңа түрі мүмкіндігі шектеулі азаматтарға көрсетілетін қызметтің жақсара түсуіне өз ықпалын тигізбек. Негізінен, есту қабілеті нашар адамдарға арналған. Енді олар қажет ақпаратты сурдоаудармашының көмегімен ала алады.
Қажет болған жағдайда вокзалдың анықтама қызметінің қызметкерлері қимыл-ишарат тілінің мамандарымен байланысқа шығып, екіжақты видеоконференция арқылы жолаушыға сурдоаудармашы қызметін көрсете алады.
Алдағы уақытта республиканың өзге де теміржол вокзалдарында есту қабілеті нашар адамдар қимыл-ишарат тілі мамандарының қызметіне жүгіне алатын болады.
