Қытайлық компаниялар ШҚО-да құс фабрикасын салуды инвестициялауға мүдделі

13 Сәуір, 2016 16:41

Кездесу барысында Қытай Халық Республикасы компанияларының Үржар ауданында салынатын құс фабрикасының құрылысын қаржыландыру мәселесі қаралды, деп хабарлады ШҚО әкімдігінің баспасөз қызметі.

Guangdong Xinyin Fund Management CO. LTD президенті Ву Чуньхуэй және «КАЗАЗНЕКА Груп» бас директоры Айдын Харун Қазақстан жерінде жобаларды іске асыруға қызығушылық танытып отырғандықтарын айтып, Шығыс Қазақстан облысында құс фабрикасының құрылысын жүргізуді қаржыландыру мәселесін қарастыратындықтарын жеткізді.

Өз кезегінде аймақ басшысы Даниал Ахметов бірлесіп жұмыс істеуге дайын екендіктерін және жобаны сәтті жүзеге асыру үшін барлық жағдай жасалатынын басып айтты. Сонымен қатар, компания басшыларына аптаның соңына дейін бизнес-жоспармен танысуды ұсынды.

Айта кетейік, құс фабрикасы пайдалануға берілген соң 800-ден астам жаңа жұмыс орны ашылады. Аталған инвестициялық жобаны іске асыру құс етін импорттау бойынша маңызды мемлекеттік тапсырманы орындайды. Фабриканы салу үшін Үржар ауданының таңдалып алуының себебі Шығыс Қазақстан мен Алматы облыстарының ірі қалаларына жақын орналасқан. Сонымен қатар, Үржар ауданында құс фабрикасының азық базасын қамтамасыз ету үшін, бос жатқан суармалы жерлер көп.

Барлық жаңалықтар