Мәжілісте ҚР-да ҚҚДБ офистер құру және олардың қызметі туралы келісімді ратификациялау туралы» заң жобасы мақұлданды

«ҚР мен Дүнежүзілік банк арасында ынтымақтастықты нығайту мақсатында 2016 жылдың 21-ші қаңтарында Давоста өткен Бүкіләлемдік экономикалық форумда Қазақстан Республикасының Үкіметі мен Дүниежүзілік банк  Қазақстан Республикасында офистер құру және олардың жұмыс істеуі туралы келісімге қол қойған болатын. Аталмыш келісім 1994 жылғы Алматы қаласында тұрақты өкілдігін құру туралы келісімді ауыстырады»,-деді Парламент Мәжілісінің жалпы отырысында ҚР Ұлттық экономика министрінің орынбасары Марат Құсайынов.

Құжатқа сәйкес, Дүниежүзілік банк Қазақстанда офистерге ие болып, оларды операциялық және әкімшілік қолдау қызметтерін көрсету үшін қызметкерлермен жасақтайтын болады. Дүниежүзілік банк қызметкерлер мен қызметшілерге жалақы мен басқа да шығыстарды толық көлемде өзіне алады. Банктің офистері мен үй-жайларына қол сұғылмайды және ол Дүниежүзілік банктің қарауы мен басқаруында болады.

Бұдан бөлек, заң жобасы аясында Банктің және оның қызметкерлерінің иммунитеттері айқындалып отыр.

Келісімге сәйкес, Дүниежүзілік банк өзіне берілетін артықшылықтардың, иммунитеттердің, жеңілдіктердің және шарттардың теріс пайдалануға ұшырамауын қамтамасыз ететін болады. Мұндай иммунитет сот төрелігінің қалыпты іске асырылуына кедергі жасайтын болса, ол өзінің иммунитеттерін кері қайтарып алатын болады.

Мәжіліс мақұлдаған заң жобасы Парламент Сенатына жолданады.  

Ботагоз Айтжанова