Алматы облысында Ақсу қант зауыты қайта іске қосылады

11 Сәуір, 2016 18:59

Он жылдай тоқтап тұрған Ақсу қант зауытына биыл жөндеу жұмыстарын жүргізу жоспарлануда. Бұл туралы аймақ басшысы Амандық Баталов аталмыш кәсіпорынға барған кезінде айтты. Облыс басшысы зауытта әлеуетті инвесторлармен және осы салаға қызмет көрсете алатын Ресей мен Украинадан келген арнайы мамандармен кездесті, деп хабарлады Алматы облысының әкімдігі.

Облыс басшысының тапсырмасына орай зауыт «Жетісу» ӘКК-не коммуналдық меншікке сатылып алынған. Жақын уақытта зауытты қайта қалпына келтіретін заңды тұлға ауқымды жұмыс бастап, ұйым құрылатын болады.

Алдын ала мәлімет бойынша, жалпы инвестиция көлемі 8 млрд. теңгені құрайтын болады. Қаржыландырудың 20 %-ы облыстан бағытталмақ.

«Бастапқы қаржы бюджетке салынған. Енді тек барлық жұмысты аяғынан тұрғызатын инвестор таңдау керек. Осы мәселемен қазір жұмыс жүргізіп жатырмыз»,-деді облыс басшысы А.Баталов.

Айта кету керек, қант қызылшасын жеткізу мәселесі ерте шешілді. Бұрын зауыттың тоқтап қалуына шикізаттың жеткізілмеуі себеп болған. Ақсу ауданында 1 260 гектарға қант қызылшасын егу жоспарланып отыр. Ал, жалпы облыс бойынша 6,4 мың гектарға қант қызылшасы егілмек.

Барлық жаңалықтар