ҚР Қарулы Күштерінің үздік мергендерін іріктеу өткізілді (ФОТО)

5 команданың әскери қызметшілері өздерінің жауынгерлік даярлықтарын көрсетті.

«Қазір бізде мерген биатлоны бойынша іріктеу жүргізілуде. Бұл сайыстар «Шығыс» өңірлік қолбасшылығында өткізіліп жатыр.  Ең үздік мергендер келді. Әр байқау сайын біз жауынгерлік даярлығымызды арттырудамыз, дене сымбатымыз жақсы қалыпта екенін сезінудеміз. Мұндай жарыстар неғұрлым көп болса, соғұрлым әскеріміз мықты болмақ», - деді 10810 әскери бөлімінің әскери қызметшісі ефрейтор Нұрсұлтан Сәбит.  Іріктеу үш кезеңде өтті.

Онда әскери қызметшілер сынығы бар қабырғадағы кедергілерді бұзып өтті, Макаров тапаншасынан, Драгуновтың мерген винтовкасынан оқ атты, Ф-1 оқу-жауынгерлік гранаталар лақтырды, сондай-ақ оқ-дәрілері бар жәшіктерді алып жүрді. Мергеннің дене сымбаты жақсы болуы абзал. Себебі, оған қалыпты керек-жарақтан басқа, анағұрлым ауыр қаруды артып жүруге тура келетінін айта кетейік.

Сәуірдің 11-і мен 15-і аралығында Қазақстанның оңтүстігінде ҚР ҚК Құрлық әскерлері арасындағы байқауға әрі қарай қатысатын 8 әскери қызметші іріктеуден өтті. Олардың арасынан Армия халықаралық ойындары – 2016 сайысына үздік мергендерді таңдап алады. Естеріңізге сала кетейік, бұл байқау Қазақстанның аумағында алғаш рет өткізілгелі отыр.