• Басты
  • Кадет корпусына түсу үшін ҰБТ өтпелі балы – 30 балды құрайды

Кадет корпусына түсу үшін ҰБТ өтпелі балы – 30 балды құрайды

8 Сәуір, 2016 11:09
Жақын арада оқушылар оқу жылын аяқтайды. Болашақ талапкерлер кәсіп таңдауға және салалық оқу орындарына түсуге дайындалуда. Дәстүрлі түрде бірқатар жоғары оқу орындарының қатарында оқуға түсуге ерекше талап қоятын Қазақстанның жоғары оқу орындары тұр, деп хабарлады Қорғаныс министрлігінің баспасөз қызметі.

Еліміздің барлық әскери оқу орындарында оқуға түсу кезіндегі талаптар өзгертілген.

«Кадет корпусына түсу кезінде ҰБТ-ның ұпайы ескеріледі. Бірақ, жоғары оқу орындарымен салыстырғанда оның өтпелі ұпайы төмен. Бұл ҰБТ-да 50-ден төмен балл жинаған бозбалалар медициналық куәландырудан өтіп, дене даярлығы бойынша нормативтерді, психологиялық тестілеуді ойдағыдай тапсырса Кадет корпусына түсуге мүмкіндік алады. Нәтижесінде мамандық алып шығып, сәйкесінше Кадет корпусын тәмамдағаннан кейін 100 пайыз жұмысқа орналастырылады.  Кадет корпусына түсу үшін өтпелі балл – 30 балды құрайды. Бұл барлығын қабылдаймыз деген сөз емес. Оқуға түсушінің денсаулығында кінәрат болмауы, моральдық және психологиялық тұрғыда тұрақты, әскери болуға бекінуі тиіс. Сол кезде оның Кадет корпусына түсуге барлық мүмкіндігі болады», - деді ҚР ҚМ Білім және ғылым департаментінің бастығы Айгүл Түлембаева.

Арнайы тексеруден өткен, оқуға денсаулық жағдайы бойынша жарамды, аттестаттағы орташа балл 3,5-тен кем болмаса, кәсіби-психологиялық тестілеу және комиссияның дене даярлығы бойынша нормативтерін тапсыратынын айта кетейік. Қабылдау кезінде олар Кадет корпусының аумағында орналастырылып, тамақпен қамтамасыз етіледі.

Оқуды аяқтағаннан кейін кадеттер «Әскери басқарудың кіші маманы (менеджер)» біліктілігі, сондай-ақ «3-сыныпты ЖӘЖМ-нің механик-жүргізушісі» және «В», «С» санаттағы автомобиль жүргізушісі куәлігі беріле отырып, «Әскери басқару» мамандығы бойынша диплом алатынын естеріңізге сала кетейік.

 

Барлық жаңалықтар