БҚО әкімі Оралдың жедел жәрдем станциясында болды (ФОТО)
Дүниежүзілік денсаулық сақтау күні облыс әкімі Алтай Көлгінов Орал қалалық жедел жәрдем стансасының қазіргі жай-күйімен танысты. Облыс басшысы диспетчерлік бөлімдегі жедел жәрдем көліктерінің қозғалыс сұлбасын GPS-навигатор арқылы бақылауға алған мамандардың қызу еңбек үстіндегі қам-қарекетіне куә болды.
Облыстық денсаулық сақтау басқармасының басшысы Қамидолла Ирменовтің айтуынша, қазіргі уақытта станса қарамағында 22 көшпелі бригада бар, олардың үшеуі мамандандырылған, екеуі жалпы бағыттағы дәрігерлік және он жетісі фельдшерлік. Жұмыс тиімділігін арттыру мақсатында 8 қосалқы бригада сағат 1800-ден басталатын қарабалас сәтте іске қосылады.
Күн сайын 500-ге жуық қоңырау қабылдайтын станция директорының орынбасары Елена Грищенконың айтуынша, кадр тапшылығы жоқ. Сонымен қатар өздерінде жас мамандарды оқытатын тренингтік орталығы да жұмыс істейтінін жеткізді. Алайда станция басшылығы тиімді жұмыс істеуге көліктер жетіспейтіні де кедергі болып отырғанын тілге тиек етті.
«Облыстағы жедел жәрдем станцияларына көлік жетіспейтіні рас. Біз бұл мәселелерді кезең-кезеңімен шешетін боламыз. Осы жылдың өзінде алғашқы көліктерге қол жеткізесіздер»- деді Алтай Көлгінов.
