Абайдың қорық-мұражайы бүлдіршіндер арасындағы бірінші байқау ұйымдастырды (ФОТО)

Байқаудың мақсаты – қазақтың ұлы ақыны Абай Құнанбайұлының өлендерін жас бүлдіршіндер арасында насихаттау және нақышына келтіріп айтуға үйрету.

Байқауға қаламыздағы «Айналайын», «Бес асыл» мектепке дейінгі шағын орталықтың тәрбиеленушілері қатысты. Әрбір өнерпаз бала Абайдың он-он екі өленін жатқа айтты.

Бұл байқауда «Абай» өнер мектебінің мәнерлеп оқу үйірмесінің оқушылары Абайдың өлеңдерін оқып, «Бес асыл» шағын орталығының бүлдіршіндері өздері дайындап әкелген «Бес асыл іс...» көрінісін, «Айналайын» шағын орталығының бүлдіршіндері Абайдың әні «Желсіз түнде жарық ай» және қазақ биі «Қамажайды» бұралтып, өзара бәсекеге түсті.

Өнер сайысының қорытындысы бойынша I-ші орынды «Бес асыл» мектепке дейінгі шағын орталықтың тәрбиеленушісі А.Болатов, II-ші орынды «Айналайын» мектепке дейінгі шағын орталығының тәрбиеленушілері Ә. Әсетұлы, А.Қыдырханова ал III-ші орынды Ш.Айдынқызы, А.Берікова, А.Искакова, А.Оспанов иеленді. Жеңімпаздар арнайы мақтау қағаздарымен және сыйлықтармен марапатталды.

Бүлдіршіндерді байқауға дайындағаны үшін «Айналайын», «Бес асыл» мектепке дейінгі шағын орталықтың басшыларына, тәрбиешілеріне арнайы алғыс хаттар тапсырылды.

«Әсемпаз болма әрнеге» байқауына Семейдің зиялы қауым өкілдері, ата-аналар, студенттер, тәрбиешілер, ұстаздар келіп қатысты. Абай мұражайында «Әсемпаз болма әрнеге» байқауын жыл сайын өткізу дәстүрге айналмақ.