Бакуде Каспи теңізінің құқықтық мәртебесі туралы Конвенцияны әзірлеу жөнінде арнайы жұмыс тобының отырысы болды
7 Сәуір, 2016 18:51
2016-шы жылдың 5-6 сәуірі күндері Бакуде Каспи жағалауындағы мемлекеттердің сыртқы істер министрлері деңгейінде Каспи теңізінің құқықтық мәртебесі туралы Конвенцияны әзірлеу жөнінде арнайы жұмыс тобының 44-ші отырысы болды, деп хабарлады ҚР СІМ.
Отырыс жұмысына Әзірбайжан Респуьликасының, Иран Ислам Республикасының, Қазақстан Республикасының, Ресей Федерациясының және Түкіменстанның делегациялары қатысты.
«Отырыс барысында бірқатар Конвенция жобалары мен маңызды ережелер келісілді. Сонымен қатар, егемендікке қатысты, Каспи теңізінің құзіреті тұрғысынан құқықтық егемендікті жүзеге асыру мәселелері қаралды»,-делінген хабарламада.
Делегация келіссөздердің қорытындысын жоғары бағалап, Әзірбайжан Республикасының кездесуді жоғары деңгейде ұйымдастырғаны үшін алғыстарын білдірді.
Арнайы жұмыс тобының келесі отырысы Иран Ислам Республикасында өтетін болады. Оның өтетін уақыты дипломатиялық келісімдер арқылы шешіледі.
