ШҚО-да автокөлік жолдарын жөндеуге қосымша қаржы бөлінеді

7 Сәуір, 2016 15:54

Өскемен қаласында «Қазақстан темір жолы» ҰК АҚ және қызығушылық танытып отырған мемелекеттік органдар, ШҚО кәсіпорындарының басшылықтарымен автокөлік жолдарын жөндеу және кірме жолдар салу мәселелері қаралды, деп хабарлады облыс әкімдігі.

Күн тәртібінде Шығыс Қазақстан облысы бойынша республикалық маңызды жолдарда 2016 жылға жөндеу жұмыстарының көлемін ұлғайту мәселесіне басты назар аударылды.

«ҚазАвтоЖол» ҰК» АҚ облыстық филиалының директоры Серік Атанов жоспарланған жөндеу жұмыстарының көлемін жөнінде ақпараттандырды. Олардың ішіндегі маңыздылары Аягөз қаласынан Ақсуат ауылына дейінгі 78 шақырым, Өскемен-Семей жол телімдері. Сонымен қатар, Осин асуындағы асфальт жолы жөнделмек.

«Қазақстан темір жолы» ҰК АҚ президенті Асқар Мамин облыс әкімі Даниал Ахметовтың аталған бағыттар бойынша қайта және орташа жөндеу жұмыстарын жүргізу үшін қосымша қаржы бөлу жөніндегі ұсынысын қолдады. Жақын уақытта орташа жөндеу жұмыстарының көлемі Өскемен-Семей бағытында 60 шақырымға дейін және Осин асуы 15 шақырымға дейін көбейеді.

Сондай-ақ, Өскемен қаласында «АЗИЯ АВТО Қазақстан» АҚ толық циклды автозауытына әкелетін теміржол кірме жолдарының құрылысы мәселесі қаралды.