Астанада отандық өндіріс мектеп формасының таныстырылымы болды

ҚР Білім және ғылым министрі Ерлан Сағадиевтің атап өтуінше, бүгінгі таңда ата-аналар мен педагогикалық қоғамдастықтың мектеп формасына деген оң көзқарастары байқалып отыр.

«Ата-аналар мен педагогикалық қоғамдастықтың мектеп формасына деген оң көзқарастары байқалып отыр.Ата-аналардың басым көпшілігі мектеп формасы оқушыларға эстетикалық өң береді, тәртіп болады, дейді. Мектеп формасын киіп жүрген оқушылар біркелкі форма кию ешқандай да жеке қасиетіне шектеу болмайтынын айтады»,-деді Е.Сағадиев.

Мектеп формасынан бөлек көрмеде спорттық формалар, трикотаж бұйымдар, мүғалімдерге арналған киімдер, жоғары сынып оқушылары үшін әскери киімдер де таныстырылды. Мұның барлығы Қазақстанның аймақтарындағы отандық кәсіпорындардан шыққан.

«Мектеп формасының қандай болуы керектігін білім беру ұйымдары мен ата-аналар қоғамдастығының таңдау құқылары бар. Бұл дұрыс деп есептеймін. Әрбір мектеп жалпыға жағымды іскерлік стиль нормасына сай болуы керек»,-деді министр.

Министр атап өткендей, мектеп формасының сәтті нұсқасы оның сыртқы келбеті, қолайлылығы, қауіпсіздігі мен функциональдылығы талапқа сай болуы керек.