Б.Сапарбаев: Ақтөбеде қылмыс картасы жасалады

Облыс басшысы «100 нақты қадам» Ұлт жоспарының облыста жүзеге асырылу барысының аралық қорытындысын жариялаған болатын.

Ұлт жоспарының 30-33 қадамдарына сәйкес, облыс орталығында жергілікті полиция қызметі құрылды. Ол қоғамдық тәртіпке, жол қауіпсіздігін қамтамасыз етуге жауап беріп қана қоймай, құқық бұзушылықтың алдын алуға да бағытталған.

Бердібек Сапарбаевтың айтуына қарағанда, жергілікті полиция қызметіндегі қызметкерлердің штаттық саны 1260.

“Жергілікті полицияның бірқатар шараларды қолға алуы облыс аумағындағы қалыпты жағдайды тұрақтандыруға мүмкіндік берді. Қылмысты тұрақтандыру жөнінде оң көрсеткіштерге қол жеткізілді. Ауыр қылмыстар көлемі 24 %-ға, орта және ауырлығы орташа қылмыстар 7 % және 17,2%-ға төмендеді”, - деп атап өтті облыс басшысы.

Облыстық ІІД полиция қызметінің айқындылығын қамтамасыз ету мақсатында облыста қоғамдық кеңес құрылды. Оның құрамына ішкі істер органдарының ардагерлері мен қоғам қайраткерлері енді.

Жыл басынан бері полция қызметкерлерінің әрекетіне 36 шағым келіп түсті, нәтижесінде 9 полиция қызметкері, оның ішінде басшылықтағы екі қызметкер тәртіптік жауапқа тартылды.

Сонымен қатар, аймақ басшысы Ақтөбеде қылмыс картасы әзірленетінін хабарлады. Құқық бұзушылық туралы ақпарат Бірегей сотқа дейінгі тергеу реестріне енгізілген соң, 3-4 минуттың ішінде картада көрініс табатын болады.

Алдағы уақытта облыстың барлық аудандары аталған картаға енгізіледі.