Ақтөбе облысында 8 кемпинг пен 4 газ құю станциясы салынады

4 Сәуір, 2016 17:23

Жақын жылдары Қобда ауданында жол бойындағы қызмет көрсету саласын дамыту мақсатында 12 ірі жоба жүзеге асатын болады. Бұл туралы аудан әкімі Асқар Жүсіпалиев «Ақтөбе ақпарат» ақпарат орталығында өткен баспасөз конференциясында хабарлады.

Қобда ауданының аумағынан 140 және 167 шақырым республикалық және облыстық маңыздағы автожол өтеді. Жергілікті билік транзиттік әлеуеті жоғары Самара-Шымкент тас жолының бойында қызмет көрсетуді дамытуға ниетті.

«Самара-Шымкент тас жолының бойында қызмет көрсетуді ұйымдастыру мақсатында 8 кемпинг пен 4 газ құю станциясын салу жоспарлануда. Жоспарланған кемпингтердің бірінің құрылысы 2016 жылы аяқталып, пайдалануға берілетін болады. Жоба 50 млн. теңгемен инвестицияланды. Бұл жерде жолаушылар автотұрақ, ТҚК, қонақ үй, кафе және кір жуатын орындарды пайдалана алады. Қалған 7 кемпингтің құрылысын 2020-шы жылға дейін аяқтау жоспарлануда. Сонымен қатар, автогаз құю станциялары 2017-2018-ші жылдары пайдалануға берілетін болады»,-деп хабарлады Асқар Жүсіпалиев.

Оның айтуынша, ауданның негізгі капиталына 2015 жылы инвестиция көлемі 3,1 млрд. теңгеге ұлғайды. Осы жылы да инвестиция тарту мен қосымша экономикалық өсімді арттыруға күш салынбақ.

Барлық жаңалықтар