Жамбыл облыстық сотында Ашық есік күні өтті

Жамбыл облыстық сотында өткен «Ашық есік күніне» Жамбыл облыстық сотының қылмыстық істер жөніндегі сот алқасының төрағасы Н.Абидов, Сот әдебі комиссиясының төрағасы А. Тілепов, Жамбыл облыстық сотының судьясы Ғ. Күлекеев, Жамбыл облысы бойынша Соттар әкімшісінің басшысы Ә. Құлдүйсенов, сондай-ақ БАҚ өкілдері қатысты.Қылмыстық істер жөніндегі сот алқасының төрағасы Нұрмұхаммат Абидов кездесуді аша келе, облыстық соттың тарихы, Ұлт Жоспарына сәйкес жүзеге асырылып жатқан сот жүйесіндегі жаңашылдықтар, Қазақстанда заңның үстемдігін қамтамасыз ету негізінде әлемдік рейтингтегі көрсеткіштердің жоғарылауы жайында айтты.

Ғ. Күлекеев өз сөзінде жаңа редакциядағы Азаматтық процестік кодекстің  қабылдануы, судья лауазымы үміткерлеріне қойылатын біліктілік талаптары жайында мәлімдеді. А.Тілепов Судьялардың әдеп кодексінің негізгі қағидаттары туралы баяндама жасады. Ә. Құлдүйсенов облыс соттарының сот процестерін аудио-бейнетіркеу жүйесімен жабдықтау, «Сот кабинеті» электрондық сервисі, «Төрелік» ақпараттық жүйесі туралы жан-жақты ойларымен бөлісті. Баяндамашылардың пікірінше, бүгінде заманауи бәсекеге қабілетті, білікті мамандарды даярлау мәселесі маңызды болып табылады.

Іс-шара аясында кездесуге келген жастардың көкейлерінде жүрген сұрақтарына судьялар толыққанды жауап беріп, азаматтардың заңды құқықтары мен мүдделерін қорғаудың жолдарын түсіндірді.

«Іс-шараның соңында Тараз мемлекеттік педагогикалық институтының деканы З. Тоқбергенова, М.Х. Дулати атындағы Тараз мемлекеттік университетінің кафедра меңгерушісі Х. Сүлейманов өткізілген кездесудің маңыздылығын атап өтіп, өздерінің алғыс сөздерін және ризашылықтарын жеткізе отырып, жастарды тәжірибеге негізделген сапалы заң білімін алуға бағыттаудың маңыздылығына тоқталды», - делінген хабарламада.