Ә.Исекешев: Қазақстанның геология саласына 900 млрд теңге көлемінде жеке инвестицияның түсуі күтілуде (ФОТО)
Өзінің құттықтау сөзінде ҚР Инвестициялар және даму министрі Әсет Исекешев геология саласының дамуы елдің экономикалық дамуында негіз қалаушы фактор болып табылатынын атап өтті.
«Геология және жер қойнауын пайдалану комитеті Rio Tinto, KORES, Iluka Resources, Ulmus Fund,Geotech, JOGMEC, KGHM Polska Miedz, IMIDRO сияқты ірі жер қойнауын пайдаланушы инвесторлар-компаниялардың, ұлттық компаниялардың қатысуымен бюджеттік қражыландырылуы 120 млрд теңге құрайтын геологиялық барлау жұмыстарының 2015-2019 жылдарға арналған бағдарламасын іске асыруда. Жер қойнауы және жер қойнауын пайдалану туралы жаңа кодекс әзірленді, онда жер қойнауын пайдалану саласындағы барлық негізгі өзгерістер шоғырландырылған. Бұл – Қазақстанның геологиялық барлау саласына инвестициялар тарту үшін барынша қолайлы жағдай жасалуын қамтамасыз етеді», - деді ол.
Министр атап өткендей, геологиялық барлау саласын дамытудың басым міндеттері елде және әлемде шикізат ресурстарын тұтыну көлемінің өсуінен туындады. Оның сөзінше, тұтастай алғанда, саланы дамытудың мемлекеттік міндеттері елдің экономикалық мүдделеріне сай келеді.
Геолог күніне арналған салтанатты шарада 120 адам «Қазақстан Республикасы жер қойнауын құрметті барлаушы», «Қазақстан Республикасы жер қойнауын үздік барлаушы» атағына ие болды.
