Ақтөбеде соңғы 3 жылда 81 автожол нысанына жөндеу жұмыстары жүргізілген
31 Наурыз, 2016 15:39
Ақтөбеде соңғы 3 жылда 81 автожол нысанына жөндеу жұмыстары жүргізілген. Бұл туралы автомобиль жолдары және жолаушылар тасымалы бөлімінің бастығы Нағымжан Алдияр «Ақтөбе ақпарат» ақпарат орталығында өткен брифингте хабарлады.
Оның айтуынша, қазіргі уақытта облыс орталығында 537 көше бар, жалпы автожол жүйесі 621 шақырымды құрайды. Оның ішіндегі асфалт-бетон жабыны бар жолдар 266,4 шақырым(42,9 %).
«Соңғы 3 жылда күрделі жөндеу жұмыстары мен қайта құруға және облыс орталығының жол құрылысын жүргізуге 7,4 млрд. теңге бөлінген. Осы қаржыға 81 нысанды жөндеу мүмкін болды»,-дейді Н. Алдияр.
Автожолдарды жөндеумен қатар, тұрғын үй алабтарының көшелері кеңейтіліп, жаяу жүргіншілердің жолдары да абаттандырылды. 13 көшеге күрделі жөндеу жұмыстары жүргізіліп, жарықтандыру да қоса атқарылған.
Ақтөбе автожолдарын жөндеуге 2016 жылы 1,5 млрд. теңге бөлінді. Оның 554 млн. теңгесі 2015 жылы басталған өтпелі 8 нысанның жұмысын аяқтауға жұмсалмақ.
