ҚР Парламенті Сенатының Комитетінде ЭКСПО-2017 бойынша заң жобасы қаралды

18 Қараша, 2013 18:03

Бүгін Қазақстан Республикасы Парламенті Сенатының Экономикалық даму және кәсіпкерлік комитетінің кеңейтілген отырысында Астанадағы ЭКСПО-2017 халықаралық мамандандырылған көрмесін өткізу мен ұйымдастыру мәселелері бойынша ҚР заңнамасына өзгерістер мен толықтырулар енгізу туралы заң жобасы бірінші оқылымда қаралды, деп хабарлайды Сенаттың баспасөз қызметі.

«Құжат ЭКСПО-2017 өткізуге үміткер елдер арасындағы байқау аясында Қазақстан Республикасы өз мойнына алған міндеттемелерді орындау мақсатында дайындалды. Заң жобасы Мемлекет басшысының 2013 жылдың 1 тамызында Халықаралық көрме бюросы Бас Хатшылығымен кездесу қорытындысы, 2013 жылдың 13 тамызында «Көрме» (ЭКСПО-2017) Көрме орталығына баруы мен 2013 жылдың 2 қыркүйегінде Қазақстан Республикасы Парламентінің III сессиясы V жиналысының ашылуындағы тапсырмасы болып табылады», - делінген хабарламада.

Заң жобасы Астана қаласында ЭКСПО-2017 халықаралық мамандандырылған көрмесін өткізу мен ұйымдастыру үшін қолайлы жағдай жасау мәселелерін заңнамалық реттеуге, тиісті инфрақұрылым құрылысына инвестиция тартуға, қатысушылар мен қонақтардың қауіпсіздігін қамтамасыз етуге, жаңа инновациялық технологияларды енгізуге, туризмді дамыту мен Қазақстан Республикасы экономикасына инвестиция тартуға бағытталған.

Заң жобасы Бюджеттік және Салық кодексіне, басқа да бірқатар заңдарға өзгерістер мен толықтырулар енгізуді қарастырады.

Тұжырымдамалық мақұлданған құжат Палата қарауына тапсырылды.