Сайлау кезінде саяси партияларға қысым көрсету байқалған жоқ – ТМД бақылаушысы

20 Наурыз, 2016 13:46

Сайлау кезінде саяси партияларға қысым көрсету байқалған жоқ.Бұл жөнінде елдегі бүгінгі сайлауға Ресей Федерациясынан бақылаушы ретінде қатысып отырған Мәскеу халықаралық университеті жанындағы Халықаралық ықпалдастық ынтымақтастығы институтының директоры Игорь Филькевич мәлімдеді.

«Ең алдымен қазақ халқын Наурыз мерекесімен құттықтағым келеді. Дәл осы көктемгі жаңару мерекесінде Қазақстан Парламентінің жаңаруы да орын алып жатқаны қуантады. Сайлау шынында да мерекелік көтеріңкі көңіл-күймен өтіп жатқаны байқалады. Сонымен қатар, сайлауға түсіп жатқан партиялардың барлығына тең мүмкіндіктер мен құқықтар берілгенін де байқадық. Үкімет немесе басқа да ұйымдар тарапынан қысым жасалғаны туралы ешқандай партиядан шағым түспеді. Айта кету керек, сайлауға түсіп жатқан партиялардың барлығы «Қазақстан – 2050» даму стратегиясын қолдайды және елдің қарқынды дамуы үшін бар күш-жігерін жұмсауға дайын. Қазіргі уақытқа дейін халықтың 25%-ға жуығы дауыс беріп үлгерген», – деді бақылаушы.

Айта кетейік, бүгін Мәжіліс пен барлық деңгейлі мәслихаттың сайлауы өтуде.

Барлық жаңалықтар